शिवसेनाप्रमुखांच्या स्मारकासाठी १०० कोटी रूपये मंजूर

एमएमआरडीएकडून उपलब्ध करून देणार

मुंबई : प्रतिनिधी

नियोजित शिवसेनाप्रमुख स्व.बाळासाहेब ठाकरे स्मारकासाठी नाममात्र दरात जमिन उपलब्ध करून दिल्यानंतर या स्मारकाच्या उभारणीसाठी राज्य सरकारकडून १०० कोटी रूपये मंजूर करण्यात आले. तसेच या स्मारकासाठी द्यावयाचे १०० कोटी रूपये एमएमआरडीएकडून उपलब्ध करून देण्यात येणार असून स्मारकाचा आराखडा तयार करण्याची जबाबदारीही मुख्यमंत्र्यांच्या अध्यक्षतेखालील एमएमआरडीएकडे सोपविण्याचा निर्णय मंगळवारी झालेल्या राज्य मंत्रिमंडळाच्या बैठकीत घेण्यात आला.

शिवसेनाप्रमुख स्व. बाळासाहेब ठाकरे यांची बुधवारी २३ जानेवारी रोजी जयंती असून स्मारकाच्या भूमिपूजनाचा घाट शिवसेनेकडून घालण्यात येत आहे. त्यापार्श्वभूमीवर राज्य सरकारने स्मारकासाठी १०० कोटी रूपयांचा निधी मंजूर केल्याचे सांगण्यात येत आहे.

याबाबत अर्थमंत्री सुधीर मुनगंटीवार यांच्याशी संपर्क साधला असता ते म्हणाले की, शिवसेनाप्रमुख स्व.बाळासाहेब ठाकरे हे फक्त शिवसेनेचे नेते नव्हते. तर ते युतीचे नेते होते. त्यांच्यापासून युवा पिढीने प्रेरणा घ्यावी या उद्देशाने त्यांचे स्मारक उभारण्यात येणार असून त्यासाठी १०० कोटी रूपये एमएमआरडीएकडून उपलब्ध करून देण्यात येणार आहेत.