जागतिक अनिश्चिततेमुळे सोन्याची जागतिक मागणी वाढली केंद्रीय बँकांनी ९ महिन्यांत ८०० टन सोने खरेदी केले

चलनवाढ, जागतिक राजकीय अनिश्चितता आणि डॉलरची सातत्याने होत असलेली मजबूती यामुळे डॉलरवरील अवलंबित्व कमी करण्यासाठी जगभरातील देशांच्या मध्यवर्ती बँकांनी चालू वर्षाच्या पहिल्या ९ महिन्यांत विक्रमी ८०० टन सोन्याची खरेदी केली आहे. जागतिक सुवर्ण परिषदेच्या आकडेवारीनुसार, केंद्रीय बँकांनी २०२२ च्या तुलनेत २०२३ च्या पहिल्या ९ महिन्यांत १४ टक्के अधिक सोने खरेदी केले आहे.

यूएस बॉन्ड उत्पन्न आणि मजबूत डॉलरमध्ये वाढ असूनही मजबूत खरेदीच्या दबावामुळे सोन्याला मोठी मागणी आहे यामुळे सोन्याच्या किमतीत मोठी वाढ झाली आहे. महागाई वाढल्याने आणि चलन कमकुवत झाल्यामुळे सोने खरेदीला वेग आला आहे. अमेरिकेने डॉलरचा वापर रशियाविरुद्ध शस्त्र म्हणून केला. त्यामुळे चीनसह अनेक देश डॉलरवरील अवलंबित्व कमी करण्यासाठी सोने खरेदी करत आहेत.

जागतिक सुवर्ण परिषदेच्या आकडेवारीनुसार, २०२३ च्या पहिल्या ९ महिन्यांत चीनकडून सोन्याची खरेदी करण्यात आली आहे. चीनची मध्यवर्ती बँक पीपल्स बँक ऑफ चायना ने यावर्षी १८१ टन सोने खरेदी केले आहे. एकूण परकीय चलन साठ्यात सोन्याच्या साठ्याचा वाटा ४ टक्क्यांनी वाढला आहे. पोलंड दुसऱ्या स्थानावर असून त्याने ५७ टन सोने खरेदी केले होते. सेंट्रल बँक ऑफ तुर्की ३९ टन सोन्याच्या खरेदीसह तिसऱ्या स्थानावर आहे.

भारतीय रिझर्व्ह बँकेने २०२३ च्या पहिल्या ९ महिन्यांतही सोने खरेदी केले आहे. गेल्या नऊ महिन्यांत, आरबीआयने १९ टनांहून अधिक सोन्याची खरेदी केली आहे, त्यापैकी ९.२१ टन सोन्याची खरेदी जुलै ते सप्टेंबर या तिसर्‍या तिमाहीत झाली आहे. आरबीआयकडे असलेल्या सोन्याच्या साठ्याचे मूल्य सुमारे ४५.४२ अब्ज डॉलर आहे.

हमासने ७ ऑक्टोबर रोजी इस्रायलवर हल्ला केला. त्यानंतर दोघांमध्ये युद्ध सुरू झाले. त्यामुळे संपूर्ण आखाती प्रदेश आणि पश्चिम आशियामध्ये तणावाचे वातावरण आहे. या तणावानंतर सोन्याचे भाव १० टक्क्यांहून अधिक वाढले आहेत. आणि सोन्याच्या खरेदीमुळे भाव आणखी वाढण्याची शक्यता आहे. वर्ल्ड गोल्ड कौन्सिलचे चीफ मार्केट स्ट्रॅटेजिस्ट जॉन रीड यांच्या मते २०२३ मध्ये सोन्याची खरेदी गेल्या वर्षीच्या १०८१ टनांपेक्षा जास्त असू शकते.