मुंबई : प्रतिनिधी
सोनू सूद हे नाव सध्या चांगलंच गाजतंय. अॅक्शनपटांपासून चरित्रपटांपर्यंत आणि मसालापटांपासून कॅामेडीपटांपर्यत वेगवेगळ्या विषयांवर आधारित असलेल्या सिनेमांद्वारे सोनू रसिकांचं मनोरंजन करण्यात यशस्वी ठरला आहे. हिंदीसोबतच दक्षिणात्य सिनेसृष्टीतही आपली छाप सोडणाऱ्या सोनूची एंट्री रोहित शेट्टीच्या दिग्दर्शनाखाली बनणाऱ्या आगामी बहुचर्चित ‘सिम्बा’ या सिनेमात झाली आहे.
करण जोहरची निर्मिती आणि रोहत शेट्टीचं दिग्दर्शन यामुळे चित्रीकरणापूर्वीच ‘सिम्बा’ची जोरदार चर्चा सुरू झाली आहे. या चित्रपटात सारा अली खानची एंट्री झाल्याची बातमी काही दिवसांपूर्वीच आम्ही दिली होती. आता सोनूची एंट्री होणं हे या सिनेमातील पुढील अपडेट्स आहेत. आजही सोनूला सलमान खानच्या ‘दबंग’मधील छेदी सिंह म्हणून ओळखलं जातं. ‘दबंग’नंतर सोनूने बऱ्याच सिनेमांमध्ये विविधांगी भूमिका साकारल्या, पण रसिकांच्या मनातील सोनूची छेदी सिंहची इमेज आजही कायम आहे. ‘सिम्बा’च्या माध्यमातून आपली एक नवीन इमेज तयार करण्याची संधी सोनूकडे असल्याचं सिनेमाशी निगडीत असलेल्या सूत्रांचं म्हणणं आहे. शीर्षक भूमिकेतील तगड्या रणवीर सिंहसोबत काम करताना सोनू स्वत:ला सिद्ध करण्यात कितपत यशस्वी होतो ते पाहायचं आहे.
या चित्रपटातील सोनूच्या लुकवर सध्या काम सुरू असल्याचं समजतं. रोहितच्या मतानुसार या सिनेमातील सोनूचा लुक लक्षवेधी आणि आजवरच्या लुकपेक्षा अगदी वेगळा असावा. यासाठी सोनूच्या वेगवेगळ्या पद्धतीचे गेटअप्स आणि लुक्सवर मेहनत घेतली जात आहे. लहान शहरांमधील व्यक्तिरेखाही उठावदारपणे पडद्यावर सादर करीत रसिकांना मोहिनी घालण्याची कला रोहितला चांगलीच अवगत आहे. त्यानुसारच रणवीरचाही गेटअप करण्यात आला आहे. आता सोनूला रोहित कोणत्या गेटअपमध्ये फिट करतो त्याबाबतची उत्सुकता वाढली आहे.