कोरोना: राज्यातील २५५३ संख्येसह मुंबई पोहोचली ५० हजारावर : रिकव्हरी रेट वाढला राज्यात १०९ जणांचा मृत्यू तर मुंबई-ठाण्यात आतापर्यंत २१३४ जणांचा मृत्यू

मुंबई: प्रतिनिधी
मागील २४ तासात राज्यात २५५३ नव्या कोरोनाग्रस्तांची आणि १०९ जणांच्या मृत्यूची नोंद झालेली आहे. राज्यातील एकूण बाधीतांची संख्या ८८ हजार ५२८ वर पोहोचली असून यातील अॅक्टीव्ह रूग्णांची संख्या ४४ हजार ३७४ वर पोहोचली आहे. महाराष्ट्रातील एकूण रूग्णसंख्येपैकी ५० हजार ८५ तर मुंबई महानगरात २१३४ जणांचा आतापर्यत मृत्यू झाल्याची माहिती आरोग्यमंत्री राजेश टोपे यांनी दिली.
तसेच आज बरे होवून १६६१ रूग्ण घरी गेले असून घरी जाणाऱ्यांची एकूण संख्या ४० हजार ९७५ वर पोहोचली आहे. राज्यातील रुग्ण बरे होण्याचे प्रमाण ( Recovery Rate ) ४६.२८ % एवढे आहे. कालपर्यत हाच रेट ४५ टक्के होता. त्यात आता वाढ होवून ४६.२८ टक्क्याने वाढला. राज्यातील मृत्यू दर – ३.५७ %. सध्या राज्यात ५,६४,७३६ लोक होम क्वारंटाईनमध्ये आहेत. राज्यात संस्थात्मक क्वारंटाईन सुविधांमध्ये ७५,७५९ खाटा उपलब्ध असून सध्या २६,७६० लोक संस्थात्मक क्वारंटाईनमध्ये आहेत. राज्यातील ज्या भागात रुग्णांचे क्लस्टर सापडले आहेत त्या ठिकाणी केंद्र सरकारच्या मार्गदर्शनानुसार क्लस्टर कंटेनमेंट कृतियोजना अंमलात आणण्यात येत आहे. राज्यात सध्या कंटेनमेंट ३५१० झोन क्रियाशील असून आज एकूण १७,८९५ सर्वेक्षण पथकांनी काम केले असून त्यांनी ६६.८४ लाख लोकसंख्येचे सर्वेक्षण केल्याचे त्यांनी सांगितले.