पंजाब नॅशनल बँकेच्या ग्राहकांना झटका, बचत खात्यावरील व्याजात कपात १ डिसेंबरपासून नवे दर लागू

मुंबईः प्रतिनिधी
देशातील दुसरी सर्वात मोठी बँक पंजाब नॅशनल बँकेने (PNB) खातेदारांना धक्का दिला आहे. बँकेने बचत खात्यावरील व्याजदरात कपात करण्याचा निर्णय घेतला आहे. बँकेने बचत खात्यावरील व्याजदर २.९० वरून २.८० टक्के पर्यंत कमी करण्याचा निर्णय घेतला आहे. १ डिसेंबरपासून नवे दर लागू होतील.
शिल्लकीवर किती व्याज मिळेल?
१ डिसेंबर २०२१ पासून बचत खात्यातील १० लाख रुपयांपेक्षा कमी बचत खात्यातील शिल्लक रकमेसाठी २.८० टक्के वार्षिक व्याजदर असेल. त्याच वेळी १० लाख रुपये आणि त्याहून अधिकसाठी, वार्षिक व्याज दर २.८५ टक्के असेल. आतापर्यंत ठेवीवर २.९० टक्के वार्षिक व्याज दिले जात आहे.
व्याजावरही कर
आयकर कायद्याच्या कलम 80TTA अंतर्गत, बँकेच्या बचत खात्याच्या बाबतीत व्याजातून वार्षिक १०,००० रुपयांपर्यंतचे उत्पन्न करमुक्त आहे. हा लाभ ६० वर्षांपेक्षा कमी वयाच्या व्यक्तीसाठी उपलब्ध आहे. तर ज्येष्ठ नागरिकांसाठी ही सूट ५० हजार रुपये आहे. यापेक्षा जास्त उत्पन्न असल्यास टीडीएस कापला जातो. व्याज उत्पन्न विहित सूट मर्यादेपेक्षा जास्त असल्यास बँकेद्वारे १० टक्के TDS कापला जातो.
स्टेट बँक ऑफ इंडिया बचत खात्यावर २.७० टक्के दराने वार्षिक व्याजदर देऊ करते. एसबीआय एक लाख रुपयांपर्यंतचा डिपॉझिटवर २.७० टक्के दराने व्याज देते. तर Kotak Mahindra Bank आणि इंडसइंड बँकेच्या बचत खात्यावर वार्षिक ४-६ % व्याजदर आहे.
खासगी क्षेत्रात आयसीआयसीआय बँकेचा बचत खात्यावरील व्याजदर ३ टक्के ते ३.५ टक्के आहे. कोटक महिंद्रा बँकेचा व्याजदर ३.५ टक्के ते ४ टक्क्याच्या दरम्यान आहे. इंडसइंड बँक ४ टक्के ते ६ टक्के व्याज देत आहे. स्मॉल फायनान्स बँकांनी देखील बचत खातेधारकांना चांगले व्याज दिले आहे. तर बचत खात्यावर खासगी बँकाकडून चांगले व्याज दिले जात आहे. देशातील दोन बँकांकडून बचत खात्यावर ७ टक्के व्याज दिले जात आहे. उज्जीवन स्मॉल फायनान्स बँक आणि एयू स्मॉल फायनान्स बँक या दोन बँकांचा सध्याचा बचत खात्याचा व्याजदर ७ टक्के आहे. सूर्योदय स्मॉल फायनान्स बँकेचा व्याजदर ६.२५ टक्के आहे.
बचत खात्यावर कोणती बँक किती व्याज देत आहे

बँक                           व्याज दर (%)

RBL बँक                  ४.२५-६.००

बंधन बँक                 ३.००-६.००

यस बँक                  ४.००-५.२५

इंडसइंड बँक            ४.००-५.००

IDFC फर्स्ट बँक          ४.००-५.००

पोस्ट ऑफिस              ४.००

ICICI बँक                 ३.००-३.५०

HDFC बँक                ३.००-३.५०

बँक ऑफ इंडिया            २.९०

SBI                           २.७०