गेल्या आर्थिक वर्षात देशात सर्वाधिक देणगी देणाऱ्या अब्जाधीशांची यादी जाहीर झाली आहे. आर्थिक वर्ष २०२२-२३ मध्ये ११९ श्रीमंत लोकांनी एकूण ८,४४५ कोटी रुपयांची देणगी दिली. देणगीचा हा आकडा गेल्या वर्षीच्या तुलनेत ५९ टक्के आणि तीन वर्षांपूर्वीच्या तुलनेत २०० टक्के जास्त आहे.
गुरुवारी जाहीर झालेल्या एडेलगिव्ह हुरुन इंडिया फिलान्थ्रॉपी लिस्ट २०२३ नुसार, टॉप १० देणगीदारांनी ५८०६ कोटी रुपयांची देणगी दिली. तर गेल्या वर्षी म्हणजेच आर्थिक वर्ष २०२२ मध्ये ही रक्कम ३,०३४ कोटी रुपये होती. शिव नाडर यांनी भारतातील दानशूरांच्या यादीत अव्वल स्थान पटकावले आहे, तर निखिल कामत हा सर्वात तरुण दानशूर ठरला आहे. आयटी कंपनी एचसीएलचे सह-संस्थापक ७८ वर्षीय शिव नाडर यांनी आपले अव्वल स्थान कायम ठेवले आहे. भारतातील श्रीमंतांच्या यादीत नाडर चौथ्या क्रमांकावर असले तरी देणगीच्या बाबतीत ते पहिल्या क्रमांकावर आहेत.
नाडर यांनी आर्थिक वर्ष २०२३ मध्ये २,०४२ कोटी रुपयांची देणगी दिली. म्हणजेच त्यांनी दररोज ५.६ कोटी रुपये दान केले. त्यांच्यापाठोपाठ विप्रोचे संस्थापक-अध्यक्ष अझीम प्रेमजी आहेत. त्यांनी १,७७४ कोटी रुपयांची देणगी दिली. भारत आणि आशियातील सर्वात श्रीमंत व्यक्ती मुकेश अंबानी या यादीत तिसऱ्या क्रमांकावर आहेत. रिलायन्स इंडस्ट्रीजच्या अध्यक्षांनी गेल्या वर्षी ३७६ कोटी रुपयांची देणगी दिली होती. टॉप १० मध्ये कुमार मंगलम बिर्ला, गौतम अदानी, बजाज, अनिल अग्रवाल, नंदन नीलेकणी, सायरस आणि आदर पूनावाला आणि रोहिणी नीलेकणी यांचा समावेश आहे. या यादीत ११९ देणगीदारांचा समावेश करण्यात आला आहे. त्यांनी २०२३ या आर्थिक वर्षात ८,४४५ कोटी रुपयांची देणगी दिली आहे. गेल्या वर्षीच्या तुलनेत हे प्रमाण ५९ टक्के अधिक आहे.
ऑनलाइन ब्रोकिंग फर्म झेरोधाचे सह-संस्थापक नितीन आणि निखिल कामत यांचाही यावर्षी देशातील सर्वोच्च देणगीदारांच्या यादीत समावेश आहे. यादीनुसार कामत बंधूंनी २०२३ मध्ये ११० कोटी रुपयांची देणगी दिली आहे. या वर्षी आपली अर्धी संपत्ती दान करण्यासाठी द गिव्हिंग प्लेजवर स्वाक्षरी करणारा निखिल कामथ या यादीतील सर्वात तरुण देणगीदार राहिला आहे. इन्फोसिसच्या सह-संस्थापकासह २५ नवीन लोक सामील झाले आहेत. यामध्ये इन्फोसिसचे सहसंस्थापक के दिनेश, रमेशचंद्र टी जैन आणि भिलोसा इंडस्ट्रीजचे कुटुंब, एक्सेलचे प्रशांत प्रकाश आणि झोहो कॉर्पोरेशनचे वेम्बू राधा यांचा समावेश आहे.
एल अँड टीचे एएम नाईक हे १५० कोटी रुपयांच्या देणगीसह यादीत ते 11व्या क्रमांकावर आहेत. हुरुन इंडिया फिलान्थ्रोपीच्या यादीत सात महिलांचाही समावेश आहे. पहिल्या क्रमांकावर रोहिणी नीलेकणी आहेत. गेल्या आर्थिक वर्षात त्यांनी १७० कोटी रुपयांची देणगी दिली. यादीत त्या दहाव्या क्रमांकावर आहेत. त्यांच्यानंतर थर्मॅक्सची अनु आगा आणि फॅमिली आहे. त्यांनी २३ कोटी रुपयांची देणगी दिली. यूएसव्हीच्या लीना गांधी तिवारी यांनीही गेल्या आर्थिक वर्षात २३ कोटी रुपयांची देणगी दिली आहे.