Marathi e-Batmya
लडाख ( Ladakh) येथे आज, शनिवारी संध्याकाळी भारतीय सैन्याचे वाहन खोल दरीत कोसळून झालेल्या अपघातात ९ जवान शहीद झालेत. कियारी शहरापासून ७ किमी अंतरावर असलेल्या कारू चौकीजवळच हा भीषण अपघात झाला.
याबाबत सैन्याच्या अधिकाऱ्यांनी सांगितले की, सैन्याच्या ताफ्यात ५ वाहने होती. तर अपघातग्रस्त वाहनात १० सैनिक होते. या दुर्घटनेत मृत्युमुखी पडलेल्यांमध्ये एका ज्युनिअर कमिशन्ड ऑफिसरसह (जेसीओ) ९ जवानांचा समावेश आहे.
यापूर्वी जम्मू-काश्मीरमधील राजौरी येथे २९ एप्रिल २०२३ रोजी सैन्याच्या रुग्णवाहिका २०० फूट खोल दरीत कोसळून २ जवान शहीद झाले होते. दरम्यान लडाखमध्ये ( Ladakh) झालेल्या अपघातावर संरक्षण मंत्री राजनाथ सिंह यांनी शोक व्यक्त केला आहे.
यासंदर्भात ट्विटरवर जारी केलेल्या संदेशात ते म्हणाले की, लद्दाखमध्ये झालेल्या अपघातात भारतीय सैनिकांच्या मृत्यूमुळे मी दु:खी आहे. वीर जवानांच्या शोकाकुल कुटुंबांसोबत माझ्या सहवेदना आहेत. अपघातातील जखमींना मैदानी रुग्णालयात दाखल करण्यात आले आहे. मी त्याच्या लवकरात लवकर बरे होण्यासाठी प्रार्थना करतो असे राजनाथ यांनी आपल्या संदेशात नमूद केले.
