Marathi e-Batmya
देशातील प्रत्यक्ष कर संकलनाचे आकडे आले असून यावेळी सरकारच्या तिजोरीत चांगलीच भर पडली आहे. १ एप्रिल २०२३ ते १६ सप्टेंबर २०२३ पर्यंत देशाचे प्रत्यक्ष कर संकलन २३.५ टक्क्यांनी वाढून ८.६५ लाख कोटी रुपये झाले आहे. प्रत्यक्ष कर संकलनात वार्षिक आधारावर २३.५ टक्क्यांची नेत्रदीपक वाढ झाली आहे. तर आगाऊ कर संकलनात २०.७ टक्क्यांनी ३,५५,४८१ कोटी रुपयांची वाढ झाली आहे.
प्रत्यक्ष कर संकलनामध्ये ४.१६ लाख कोटी रुपयांचा कॉर्पोरेशन कर आणि ४.४७ लाख कोटी रुपयांचा वैयक्तिक आयकर देखील समाविष्ट आहे, ज्यामध्ये सिक्युरिटीज ट्रान्झॅक्शन टॅक्स (STT) देखील समाविष्ट आहे. १ एप्रिल २०२३ ते १६ सप्टेंबर या कालावधीत प्रत्यक्ष कर संकलन ८,६५,११७ कोटी रुपये राहिले आहे. गेल्या वर्षी याच कालावधीत प्रत्यक्ष कर संकलन ७,००,४१६ कोटी रुपये होते. २०२३-२४ या आर्थिक वर्षासाठी सरकारने १६ सप्टेंबर २०२३ पर्यंत १,२१,९४४ कोटी रुपयांचा परतावा जारी केला आहे. चालू आर्थिक वर्षाच्या पहिल्या सहा महिन्यांत,कॉर्पोरेशन कर ४,१६,२१७ कोटी रुपये होता. तर वैयक्तिक आयकर ४,४७,२९१ कोटी रुपये होता.
ही आकडेवारी जाहीर करताना केंद्रीय प्रत्यक्ष कर मंडळाने सांगितले की, प्रत्यक्ष करांचे एकूण संकलन (परतावा समायोजित करण्यापूर्वी) ९,८७,०६१ कोटी रुपये होते. गेल्या वर्षी हा आकडा ८,३४,४६९ कोटी रुपये होता. अशा प्रकारे यामध्ये १८.२९ टक्क्यांनी वाढ झाली आहे.
चालू आर्थिक वर्षात १६ सप्टेंबरपर्यंत तात्पुरती आगाऊ कर संकलन ३,५५,४८१ कोटी रुपये झाले आहे. जे मागील वर्षी याच कालावधीत २,९४,४३३ कोटी रुपये होते. आगाऊ कर संकलनात २०.७ टक्क्यांनी वाढ झाली आहे. करचुकवेगिरी थांबवण्याच्या सरकारच्या प्रयत्नांना फळ मिळत आहे आणि कर संकलन प्रक्रियेत प्रगत तंत्रज्ञानाचा वापर यासाठी उपयुक्त ठरत आहे. याचा पुरावा सातत्याने वाढत असलेला थेट कर संकलन आणि आगाऊ कर संकलन आहे.
