भारताचा डॉलरचा साठा पुन्हा घटला इतका राहिला परकीय चलन साठा

परकीय चलनाच्या आघाडीवर भारताची स्थिती चांगली नाही. सलग तिसऱ्या आठवड्यात परकीय चलनाच्या साठ्यात मोठी घट झाली आहे. सध्या विदेशी गुंतवणूकदार शेअर बाजारातून मोठ्या प्रमाणावर पैसा काढून घेत आहेत. शेअर बाजारही यामुळे कोसळला आहे. त्यामुळे देशाच्या परकीय चलनाच्या साठ्यावर त्याचा परिणाम झाला आहे.

भारताच्या परकीय चलनाच्या साठ्यात २२ सप्टेंबरला संपणाऱ्या आठवड्यात २.३३ अब्ज डॉलरची घट झाली. दुसरीकडे, आपला शेजारी देश पाकिस्तानमधील परकीय चलनही या आठवड्यात घटले आहे. पण ही कमतरता भारताच्या तुलनेत खूपच कमी आहे. या काळात पाकिस्तानच्या परकीय चलनाच्या साठ्यात केवळ १४८ दशलक्ष डॉलर्सची घट झाली आहे.

डॉलरचा साठा किती शिल्लक
भारतीय रिझर्व्ह बँकेने जारी केलेल्या आकडेवारीनुसार, २२ सप्टेंबर रोजी संपलेल्या आठवड्यात परकीय चलनाच्या साठ्यात २.३३५ अब्ज डॉलरची घट झाली आहे. याच्या एक आठवडा आधी म्हणजे १५ सप्टेंबर २०२३ रोजी संपलेल्या आठवड्यात ८६७ दशलक्ष डॉलर्सची घट झाली होती. त्यापूर्वी, म्हणजे ८ सप्टेंबर रोजी संपलेल्या आठवड्यात, ४.९९२ अब्ज डॉलरची मोठी घसरण झाली होती. यासह परकीय चलन साठा आता ५९०.७०२ अब्ज डॉलर इतका कमी झाला आहे. भारताच्या परकीय चलन साठ्याने ऑक्टोबर २०२१ मध्ये ६४५ अब्ज डॉलर इतका उच्चांक गाठला होता.

परकीय चलन संपत्तीतही घट झाली
रिझर्व्ह बँकेने जाहीर केलेल्या साप्ताहिक आकडेवारीनुसार भारताच्या परकीय चलन संपत्तीतही समीक्षाधीन आठवड्यात घट झाली आहे. २२ सप्टेंबर रोजी संपलेल्या आठवड्यात परकीय चलन मालमत्ता (FCAs) २.५५२ अब्ज डॉलरने घसरली. आता हा साठा ५२३.३६३ अब्ज डॉलरवर आहे. याच्या आठवडाभर आधीही ५११ दशलक्ष डॉलर्सची घट झाली होती. परकीय चलन मालमत्ता किंवा विदेशी चलन मालमत्ता (FCA) हा एकूण परकीय चलन साठ्याचा एक महत्त्वाचा भाग आहे. डॉलरमध्ये व्यक्त केलेली, परकीय चलन मालमत्ता युरो, पाउंड आणि येन यांसारख्या बिगर यूएस चलनांमधील हालचालींचे परिणाम देखील विचारात घेतात.

सोन्याच्या साठ्यात वाढ
या महिन्याच्या २२ तारखेला संपलेल्या आठवड्यात भारताच्या सोन्याच्या साठ्यात वाढ झाली आहे. या आठवड्यात सोन्याचा साठा ३०७ दशलक्ष डॉलरने वाढला आहे. याच्या एक आठवड्यापूर्वी,१५ सप्टेंबर रोजी संपलेल्या आठवड्यात ३८४ दशलक्ष डॉलरची घट झाली होती. याच्या आठवडाभर आधीही ५५४ दशलक्ष डॉलर्सची घट झाली होती. आता सोन्याचा साठा ४४.३०७ अब्ज डॉलरवर पोहोचला आहे.

एसडीआरमध्ये घट
रिझर्व्ह बँकेच्या आकडेवारीनुसार, गेल्या आठवड्यात भारताच्या स्पेशल ड्रॉइंग राइट्स (SDR) मध्ये घट झाली आहे. एसडीआर ७९ दशलक्ष डॉलरने घसरून १८.०१२ अब्ज डॉलर झाला. याआधी आठवड्याभरात ३२ दशलक्ष डॉलरची वाढ झाली होती. रिझर्व्ह बँक ऑफ इंडियाच्या आकडेवारीनुसार, आंतरराष्ट्रीय नाणेनिधी (IMF) कडे ठेवलेल्या देशाच्या चलन साठ्यातही समीक्षाधीन आठवड्यात घट झाली आहे.