ऑगस्ट महिन्यात किरकोळ महागाई दरात घट झाली आहे. या महिन्यात किरकोळ महागाई ६.८३ टक्क्यांवर आली. यापूर्वी जुलैमध्ये हा दर ७.४४ टक्क्यांवर पोहोचला होता. भाज्यांच्या कमी दरामुळे महागाईत ही घसरण झाली आहे. मात्र, चलनवाढीचा दर अजूनही आरबीआयच्या ६ टक्क्यांच्या वरच्या सहनशीलतेच्या मर्यादेपलीकडे आहे.
ऑगस्ट महिन्यात शहरी चलनवाढीचा दर ६.५९ टक्क्यांवर आला होता. तो जुलैमध्ये ७.२० टक्के होता. ग्रामीण भागातील महागाईचा दर ऑगस्टमध्ये ७.०२ टक्क्यांवर आला आहे, जो जुलैमध्ये ७.६३ टक्के होता. देशातील महागाई जुलैमध्ये ११.५१ टक्क्यांवरून ऑगस्टमध्ये ९.९४ टक्क्यांवर घसरली आहे.
जुलैमध्ये महागाईचा दर ७.४ टक्क्यांवर गेल्या १५ महिन्यांतील सर्वोच्च पातळीवर पोहोचला होता. मात्र, ऑगस्टमध्ये त्यात आता ०.६१ टक्क्यांनी घट झाली आहे. सलग दुसऱ्या महिन्यात किरकोळ महागाई दर आरबीआयने निर्धारित केलेल्या २ ते ६ टक्क्यांच्या लक्ष्यापेक्षा जास्त आहे. याशिवाय, हा सलग ४७ वा महिना आहे जेव्हा महागाई दर आरबीआयने निर्धारित केलेल्या सरासरी ४ टक्क्यांच्या लक्ष्यापेक्षा जास्त आहे.
जुलैमध्ये झालेल्या पतधोरण बैठकीची माहिती देताना आरबीआय गव्हर्नर म्हणाले होते की, चलनवाढीबाबत चिंता आणि अनिश्चितता अजूनही कायम आहे. आरबीआयच्या अंदाजानुसार, आर्थिक वर्ष २०२३-२४ मध्ये महागाई ४ टक्क्याच्या वर राहण्याची शक्यता आहे. आरबीआयने आर्थिक वर्ष २०२३-२४ चलनवाढीचा अंदाज ५.१ टक्क्यावरून ५.४ टक्क्यापर्यंत वाढवला आहे.