Marathi e-Batmya
ऑगस्ट महिन्यात देशाचे औद्योगिक उत्पादन (IIP) १०.३ टक्क्यांनी वाढले आहे. गुरुवारी जाहीर झालेल्या अधिकृत आकडेवारीत ही माहिती देण्यात आली आहे. औद्योगिक उत्पादन निर्देशांकाद्वारे मोजले जाणारे औद्योगिक उत्पादन गेल्या वर्षी याच महिन्यात ०.७ टक्क्यांनी घसरले होते.
राष्ट्रीय सांख्यिकी कार्यालयाने (NSO) जारी केलेल्या आकडेवारीनुसार, ऑगस्ट २०२३ मध्ये उत्पादन क्षेत्राचे उत्पादन ९.३ टक्क्यांनी वाढले आहे. तर खाण उत्पादनात १२.३ टक्के आणि वीज उत्पादनात १५.३ टक्के वाढ झाली आहे. चालू आर्थिक वर्षातील एप्रिल-ऑगस्ट या पहिल्या पाच महिन्यांत औद्योगिक उत्पादनात ६.१ टक्क्यांनी वाढ झाली आहे. गेल्या वर्षी याच कालावधीत औद्योगिक उत्पादनाची वाढ ७.७ टक्के होती.
उत्पादन आणि खाण क्षेत्राच्या चांगल्या कामगिरीमुळे ऑगस्ट महिन्यात देशातील औद्योगिक उत्पादन उत्कृष्ट झाले आहे. ऑगस्टमध्ये उत्पादन क्षेत्राचा आयआयपी दर ९.३ टक्के होता. मागील महिन्यात म्हणजे जुलै २०२३ मध्ये उत्पादन क्षेत्राचा आयआयपी दर ४.६ टक्के होता. खाण क्षेत्राची वाढ ऑगस्ट २०२३ मध्ये १२.३ टक्के झाली आहे, जी मागील महिन्यात म्हणजेच जुलै २०२३ मध्ये १०.७ टक्के होती.
ऑगस्टमध्ये प्राथमिक वस्तूंचा आयआयपी दर वाढून १२.४ टक्के झाला आहे, जो गेल्या महिन्यात जुलैमध्ये ७.६ टक्के होता. वीज क्षेत्राच्या वाढीतही चांगली वाढ झाली असून ती १५.३ टक्क्यांवर आली आहे. जुलै २०२३ मध्ये ते ८ टक्के होते.
ऑगस्टमध्ये पायाभूत सुविधांच्या उत्पादनांचा औद्योगिक विकास दर १४.९ टक्के होता. महिन्या दर महिन्याच्या आधारे पाहिल्यास जुलैमध्ये तो ११.४ टक्के होता. भांडवली वस्तूंचा आयआयपी दर वाढून १२.६ टक्के झाला आहे, जो गेल्या महिन्यात जुलैमध्ये ४.६ टक्के होता.
