परकीय चलनाच्या साठ्यात मोठी घसरण सलग पाचव्या आठवड्यात घट, कारण जाणून घ्या

देशाचा परकीय चलन साठा ६ ऑक्टोबर रोजी संपलेल्या आठवड्यात २.१७ अब्ज डॉलरने घसरून ५८४.७४ अब्ज डॉलरवर आला आहे. रिझर्व्ह बँक ऑफ इंडियाने (आरबीआय) ही माहिती दिली. गेल्या आठवड्यात, देशाचा एकूण चलन साठा ३.७९ अब्ज डॉलरने घसरून ५८६.९१ अब्ज डॉलर झाला.

ऑक्टोबर २०२१ मध्ये देशाच्या परकीय चलन साठ्याने ६४५ अब्ज डॉलर इतका सर्वकालीन उच्चांक गाठला होता. पण गेल्या वर्षी जागतिक घडामोडींमुळे निर्माण होणाऱ्या दबावांमध्ये आरबीआयने रुपयाच्या विनिमय दरातील घसरण थांबवण्यासाठी या भांडवली राखीव निधीचा वापर केला, ज्यामुळे परकीय चलनाच्या साठ्यात घट झाली.

रिझव्‍‌र्ह बँकेच्या साप्ताहिक आकडेवारीनुसार, परकीय चलन साठ्याचा एक महत्त्वाचा भाग असलेली विदेशी चलन मालमत्ता ६ ऑक्टोबर रोजी संपलेल्या आठवड्यात ७०७ दशलक्ष डॉलरने घसरून ५१९.५३ अब्ज डॉलर झाली आहे.

डॉलरमध्ये व्यक्त केलेली परकीय चलन मालमत्ता युरो, पाउंड आणि येन यांसारख्या बिगर यूएस चलनांमधील हालचालींचे परिणाम देखील विचारात घेतात. सोन्याच्या साठ्याचे मूल्य १.४२ अब्ज डॉलरने घटून ४२.३१ अब्ज डॉलर झाले.

एकीकडे रुपयाच्या तुलनेत डॉलर मजबूत होत आहे, तर जागतिक कारणांमुळे कच्च्या तेलाच्या किमतीही वाढत आहेत, त्यानंतर आरबीआयच्या परकीय चलनाच्या साठ्यात आणखी घट होण्याची शक्यता आहे. खरे तर सरकारी तेल कंपन्यांना कच्च्या तेलाच्या खरेदीसाठी अधिक डॉलर्सची गरज भासेल.

आकडेवारीनुसार, स्पेशल ड्रॉइंग राइट्स (SDR) १५ दशलक्ष डॉलरने घसरून १७.९२ अब्ज डॉलर झाले. समीक्षाधीन आठवड्यात, आंतरराष्ट्रीय नाणेनिधी (IMF) कडे ठेवलेला देशाचा चलन साठा ११९ दशलक्ष डॉलरने कमी होऊन ४.९८ अब्ज डॉलर झाला आहे.