Breaking News

एसटी कामगारांकडून घेतलेल्या पैशाप्रकरणी खोत व पडळकरांचीही चौकशी करा काँग्रेस प्रवक्ते अतुल लोंढे यांची मागणी

एसटी कामगारांच्या पाच महिन्यातील आंदोलनादरम्यान त्यांच्याकडून प्रत्येकी ५५० रुपये घेतल्याचे उघड झाले असून जवळपास ७० ते ७५ हजार एस. टी. कामगार या आंदोलनात सहभागी झाले होते. या आंदोलनाचे नेतृत्व भाजपाचे माजी राज्यमंत्री आ. सदाभाऊ खोत व भाजपा आमदार गोपीचंद पडळकर यांनी केले होते. या दोघांना या वसुलीतील किती हिस्सा मिळाला? कशाच्या आधारे ही वसुली केली? याची चौकशी करून दोषींवर कारवाई करावी अशी मागणी काँग्रेस मुख्य प्रवक्ते अतुल लोंढे यांनी केली.
राष्ट्रवादी काँग्रेसचे सर्वेसर्वा शरद पवार यांच्या सिल्व्हर ओक या निवासस्थानावर एसटी कर्मचाऱ्यांनी हल्लाबोल करत आंदोलन केल्याप्रकरणी अॅड गुणरत्न सदावर्ते यांना अटक करून पोलिस कोठडी न्यायालयाने दिली. त्यानंतर पोलिसांनी केलेल्या तपासात सदावर्ते यांनी कामगारांची याचिका लढविण्यासाठी प्रती कर्मचारी ५५० रूपये जमा करण्यात आले. तसेच या जमा केलेल्या निधीतून सिल्व्हर ओकवर आंदोलन केलेल्याना पैसे तर दिले नाहीत ना? याची चौकशी सध्या पोलिसांकडून करण्यात येत आहे.
यापार्श्वभूमीवर काँग्रेस प्रवक्ते अतुल लोंढे म्हणाले की, हजारो एस. टी. कामगारांनी त्यांच्या मागण्यांसाठी आझाद मैदानात पाच महिने आंदोलन केले. महाविकास आघाडी सरकार या कामगारांच्या पाठीशी पहिल्यापासून खंबीरपणे उभे होते, पगारवाढीसह त्यांच्या इतर मागण्याही मान्य केल्या आहेत. परंतु यादरम्यान कामगारांकडून प्रत्येकी ५५० रुपये घेतले गेल्याचे उघड झाले आहे. काही एस. टी. कामगारांनी त्यांच्याकडून पैसे घेतल्याच्या बातम्या प्रसार माध्यमांवर प्रसारित झाल्या आहेत. या आंदोलनाचे नेतृत्व माजी राज्यमंत्री सदाभाऊ खोत व आमदार गोपीचंद पडळकर यांनी केले होते. या दोन्ही आमदारांना या वसुलीतील हिस्सा मिळाला का? कोणत्या आधारे त्यांनी ही वसुली केली ? या वसुलीतील वाटपावरूनच सदाभाऊ खोत व गोपीचंद पडळकर यांचे वकील सदावर्ते गुणरत्ने यांच्याशी वाद होऊन बाहेर पडावे लागले का, याचा खुलासा झाला पाहीजे अशी मागणीही त्यांनी यावेळी केली.

Check Also

अजित पवार म्हणाले, …मंत्रिमंडळ उपसमितीच गुंडाळली

मराठवाडा मुक्तीसंग्राम दिन आणि मराठवाडा मुक्तीसंग्रामाचे अमृतमहोत्सवी वर्ष साजरे करण्यासंदर्भात राज्यातील एकनाथ शिंदे सरकारकडून दाखविण्यात …

Leave a Reply

Your email address will not be published.