Marathi e-Batmya
दिल्लीच्या कालकाजी येथील भाजपाचे उमेदवार रमेश बिधुरी यांनी रविवारी आपल्या विधानसभा मतदारसंघात विजयी झाल्यास येथील रस्ते काँग्रेस नेत्या प्रियंका गांधी वड्रा यांच्या गालाप्रमाणे गुळगुळीत करू असे आक्षेपार्ह विधान केले. त्यामुळे दिल्लीच्या राजकारणात मोठे वादंग निर्माण झाले आहे.
“लालू यादव यांनी एकेकाळी प्रसिद्ध असा दावा केला होता की ते बिहारचे रस्ते हेमा मालिनी यांच्या गालासारखे गुळगुळीत करू, पण ते आश्वासन पूर्ण करण्यात ते अयशस्वी ठरले. मी तुम्हाला खात्री देतो की, ज्याप्रमाणे आम्ही ओखला आणि संगम विहारमधील रस्त्यांचा कायापालट केला. कालकाजीतील प्रत्येक रस्ता प्रियंका गांधींच्या गालाप्रमाणे गुळगुळीत होईल याची आम्ही खात्री करू, असे असभ्य टीपण्णी भाजपा खासदार रमेश बिधुरी यांनी नवी दिल्लीत एका कार्यक्रमात बोलताना केली.
या टिप्पणीवर काँग्रेस नेत्यांकडून मोठ्या प्रमाणात संताप व्यक्त करण्यात आला, ज्यांनी भाजपावर “महिलाविरोधी मानसिकता” असल्याचा आरोप केला.
काँग्रेसच्या प्रवक्त्या सुप्रिया श्रीनाटे यांनी बिधुरी यांच्या टिप्पण्यांवर टीका केली आणि त्यांना ‘लज्जास्पद’ आणि महिलांबद्दलच्या “घृणास्पद मानसिकतेचे” प्रतिबिंब म्हटले. “भाजपा अत्यंत महिलाविरोधी आहे. रमेश बिधुरी यांनी प्रियंका गांधींबाबत केलेले वक्तव्य केवळ लज्जास्पदच नाही तर त्यांची घृणास्पद मानसिकताही दर्शवते. ज्या व्यक्तीने संसदेत आपल्या सहकारी खासदाराला शिवीगाळ केली, त्याच्याकडून कोणती अपेक्षा ठेवणार ? असा खोचक सवाल एक्स X वर केला.
सुप्रिया श्रीनाटे यांनी भाजपा नेतृत्वाला हात जोडून प्रियंका गांधी यांची माफी मागावी, अशी मागणी केली.
काँग्रेसचे ज्येष्ठ नेते पवन खेरा यांनीही अशीच भावना व्यक्त केली आणि असे प्रतिपादन केले की बिधुरी यांचे शब्द भाजपाचे वैचारिक पालक राष्ट्रीय स्वयंसेवक संघा (आरएसएस) ची मूल्ये संस्कारीत मुल्यांचे प्रतिबिंब असल्याची टीका केली.
काँग्रेस नेते पवन खेरा म्हणाले की, “हा असभ्यपणा या नीच माणसाची मानसिकता दर्शवत नाही, तर तो त्याच्या मालकांची वास्तविकता दर्शवतो. वरपासून खालपर्यंत तुम्हाला राष्ट्रीय स्वयंसेवक संघाची मूल्ये भाजपाच्या या क्षुद्र नेत्यांमध्ये दिसतील अशी खोचक टीकाही केली.
रमेश बिधुरी यांनी आपल्या टिप्पणीचा बचाव केला आणि असा युक्तिवाद केला की काँग्रेसकडे त्यांच्या मागील कृतींमुळे त्यांच्यावर टीका करण्याचे कोणतेही कारण नाही.
रमेश बिधुरी यांनी लालूप्रसाद यादव यांच्या हेमा मालिनी यांच्याबद्दलच्या टिप्पण्यांकडे एक उदाहरण म्हणून लक्ष वेधले आणि ते पुढे म्हणाले, “माझ्या विधानामुळे काँग्रेस दुखावले असेल, तर त्यांनी हेमा मालिनी यांची माफी का मागितली नाही? त्या एक प्रसिद्ध कलाकार आहेत ज्यांनी देशाचा गौरव केला आहे. भारतात हेमा मालिनी एक महिला नाही का, जी प्रियांका गांधी यांच्यापेक्षा जास्त सरस आहे.
भाजपाच्या उमेदवाराने नंतर आपला एक्स हँडल घेतला आणि आपला हेतू कोणाचाही अपमान करण्याचा नव्हता असे सांगितले.
रमेश बिधुरी म्हणाले की, “माझ्या एका संदर्भात दिलेल्या विधानाच्या आधारे काही लोक राजकीय फायद्यासाठी सोशल मीडियावर चुकीची विधाने करत आहेत. माझा हेतू कोणाचाही अपमान करण्याचा नव्हता. पण तरीही कोणी दुखावले गेले असेल तर मी खेद व्यक्त करतो, असे सांगत खेद व्यक्त केला.
दरम्यान, काँग्रेस आणि इंडिया आघाडीचे सहयोगी आम आदमी पार्टीनेही बिधुरी यांच्या टिप्पण्यांचा निषेध केला. ‘आप’चे खासदार संजय सिंह यांनी ‘स्वस्त आणि निर्लज्ज’ असे वक्तव्य करून भाजपाच्या महिलांच्या सन्मानावर प्रश्नचिन्ह उभे केले आहे.
संजय सिंह पुढे बोलताना म्हणाले की, “हे अत्यंत लाजिरवाणे आहे. भाजपाने संसदेत अपमानास्पद भाषा वापरणाऱ्या व्यक्तीला आणि लोकांमध्ये खुलेआम पैसे वाटणाऱ्या व्यक्तीलाही तिकीट दिले आहे, काँग्रेसच्या वरिष्ठ नेत्यावर अशी खालच्या पातळीवरील निर्लज्ज टिप्पणी करणे अत्यंत दुर्दैवी आहे. त्यांच्या राजवटीत त्यांना कोणत्या प्रकारची सुरक्षा मिळणार आहे हे दिल्लीतील महिलांना समजले असेल, असेही पुढे म्हणाले.
बिधुरी यांनी वादग्रस्त विधाने केल्याने अडचणीत येण्याची ही पहिलीच वेळ नाही. २०२३ मध्ये, बिधुरी यांनी लोकसभेत तत्कालीन बसपा खासदार दानिश अली यांच्याविरुद्ध जातीय टिप्पणी केली. कॅमेऱ्यात टिपलेल्या या वक्तव्याचे वर्णन अनेक राजकीय नेत्यांनी एका खासदारासाठी अशोभनीय असे केले होते.
भाजपा नेत्याने नंतर आक्षेपार्ह टिप्पणीबद्दल “खेद” व्यक्त केला.
