निसर्गग्रस्त फळबाग-भात शेतकऱ्यांसाठी स्वतंत्र पॅकेजची आवश्यकता राष्ट्रवादी काँग्रेसचे राष्ट्रीय अध्यक्ष शरद पवार यांचे आश्वासन

श्रीवर्धन: प्रतिनिधी
मागील दोन-तीन महिन्यापासून राज्यावर कोरोनाचे संकट आलेले आहे. या संकटाचा सामना संपूर्ण राज्य करत असतानाच आता निसर्ग चक्रीवादळाने कोकणावर धावा केला. वादळामुळे येथील फळबागा, भात शेती, घरांचे मोठ्या प्रमाणावर नुकसान झाल्याचे दिसून येत आहे. त्यामुळे या भागातील शेतकऱ्यांसाठी पुढील ८ ते १० वर्षाचा अंदाज बघून केंद्र आणि राज्य सरकारने स्वतंत्र पॅकेज द्यावे अशी मागणी करत त्यासाठी राज्य सरकारमध्ये राष्ट्रवादी काँग्रेसच्यावतीने भर देणार असल्याचे पक्षाध्यक्ष राष्ट्रवादी काँग्रेसचे सर्वेसर्वा शरद पवार यांनी आश्वासन दिले.
रायगड जिल्ह्यातील वादळग्रस्त भागाचा दौरा केल्यानंतर श्रीवर्धन येथे पत्रकारांशी बोलताना त्यांनी सांगितले. यावेळी त्यांच्यासोबत पालकमंत्री आदीती तटकरे, खासदार सुनिल तटकरे आदी उपस्थित होते.
रायगडमध्ये प्रामुख्याने आंबा, सुपारी, नारळ, काजूच्या बागा आहेत. तसेच भात शेती करणारेही शेतकरी मोठ्या प्रमाणावर आहेत. या वादळात फळबागा असलेली शेती मोठ्या प्रमाणावर उदवस्थ झाल्याचे दिसून येत आहे. या बागांचे नुकसान पाहता पुढील ८ ते १० वर्षे येथील शेतकऱ्यांना मोठ्या प्रमाणावर आर्थिक नुकसानीला सामोरे जावे लागणार असल्याची भीती व्यक्त करत येथील घरांचे, पिण्याच्या पाण्याचा पुरवठा करणाऱ्या यंत्रांचा आणि वीज पुरवठा करणाऱ्या व्यवस्थेचे मोठ्या प्रमाणावर नुकसान झाले आहे. पुढील काही दिवसात आधी येथील पाणी पुरवठा सुरळीत होण्यासाठी प्रयत्न करायला पाहिजे असे सांगत या भागासाठी स्वतंत्र पॅकेजची गरज असल्याचे त्यांनी सांगितले.
वादळग्रस्त भागाची पाहणी करण्यासाठी केंद्र सरकारचे पथकही येणार असल्याचे समजते. त्यामुळे वादळामुळे झालेल्या नुकसानीची संपूर्ण माहिती या पथकाला देण्याचे आवाहन त्यांनी स्थानिकांना यावेळी केले.
या भागातील नुकसानकारक परिस्थिती पाहता केंद्राच्या मदतीशिवाय चांगले पॅकेज देणे शक्य नाही. त्यामुळे केंद्र आणि राज्य सरकारने एकत्र येवून यासाठी पॅकेज देणे गरजेचे आहे. केंद्र सरकारचे पथक येवून गेल्यानंतर येथील पंचनाम्याची माहिती घेवून यासंदर्भात केंद्र सरकारशी बोलणार असल्याचे त्यांनी सांगितले.