३ विद्यमान खासदारांसह १२ जण राष्ट्रवादीकडून रिंगणात राजू शेट्टी यांना पाठिंबा प्रदेशाध्यक्ष जयंत पाटील यांची घोषणा

मुंबईः प्रतिनिधी
राज्यातील बारामतीच्या खासदार सुप्रिया सुळे, साताराचे उद्यनराजे भोसले, कोल्हापूरचे धनंजय महाडीक या विद्यमान खासदारांना पुन्हा एकदा लोकसभा निवडणूकीसाठी उमेदवारी जाहीर करत रायगड लोकसभा मतदारसंघातून सुनिल तटकरे यांना उमेदवारी जाहीर करत असल्याची घोषणा प्रदेशाध्यक्ष जयंत पाटील यांनी करत राष्ट्रवादी काँग्रेसची पहिली यादी जाहीर केली.
याशिवाय ठाणे लोकसभेसाठी आनंद परांजपे, जळगांव मधून गुलाबराव देवकर, बुलढाण्यातून राजेंद्र शिंगणे, परभणीतून राजेस विटेकर, ईशान्य मुंबईतून मागील निवडणूकीतील पराभूत उमेदवार संजय दिना पाटील, कल्याणमधून बाबाजी बाळाराम पाटील, लक्षव्दीपमधून मोहम्मद पी.पी.फैजल यांच्या नावाची पहिली यादी जाहीर करत असल्याचे त्यांनी सांगितले.
तर हातकणंगलेची लोकसभेची जागा स्वाभिमानी शेतकरी पक्षासाठी सोडण्यात आली असून तेथील जो उमेदवार असेल त्याला राष्ट्रवादी काँग्रेसचा पाठिंबा राहणार असल्याचे त्यांनी सांगितले.
तर उर्वरीत नावांची यादी लवकरचं जाहीर करणार असल्याचेही त्यांनी यावेळी सांगितले.