राकेश झुनझुनवाला यांना ‘या’ शेअर्समधून ४२१ टक्के नफा झाला मात्र आयपीओ गुंतवणूकदारांचे १० टक्के नुकसान

मराठी ई-बातम्या टीम

भारतीय अब्जाधीश आणि शेअर बाजारातील प्रसिद्ध गुंतवणूकदार राकेश झुनझुनवाला यांना अलीकडेच शेअर बाजारात लिस्ट झालेल्या शेअर्सने ५,४१८ कोटी रुपयांचा नफा दिला आहे. म्हणजे त्यांच्या नफ्यात तब्बल ४२१ टक्के वाढ झाली आहे. मात्र, या शेअर्समध्ये IPO गुंतवणूकदारांना १० टक्के तोटा झाला. विमा कंपनी स्टार हेल्थ अँड अलाईड इन्शुरन्स कंपनीच्या शेअर्सचे लिस्टींग १० डिसेंबर रोजी झाले.

भारताचे वॉरेन बफे म्हणून प्रसिद्ध असलेले राकेश झुनझुनवाला या कंपनीचे प्रवर्तक आहेत. त्यांची या कंपनीत १४.९८ टक्के भागीदारी आहे. बुधवारी स्टार हेल्थचे शेअर्स ९०० रुपयांच्या इश्यू किमतीच्या तुलनेत ८०९ रुपयांवर बंद झाले आहेत. म्हणजेच IPO गुंतवणूकदारांचे भांडवल सुमारे १० टक्क्यांनी कमी झाले आहे. स्टार हेल्थच्या रेड हेरिंग प्रॉस्पेक्टस (RHP) नुसार, झुनझुनवाला यांनी मार्च २०१९ ते नोव्हेंबर २०२१ दरम्यान या विमा कंपनीमध्ये १४.९८ टक्के हिस्सा खरेदी केला. त्यांनी ८.२८ कोटी शेअर्स केवळ १५५.२८ रुपयांना विकत घेतले होते. ही किंमत कंपनीच्या IPO साठी निश्चित केलेल्या प्राइस बँडच्या वरच्या किमतीच्या जवळपास ८३ टक्के अधिक आहे. याशिवाय राकेश झुनझुनवाला यांची पत्नी रेखा झुनझुनवाला यांच्याकडेही स्टार हेल्थचे शेअर्स आहेत. रेखा झुनझुनवाला यांच्याकडे स्टार हेल्थचे १.७८ कोटी शेअर्स आहेत, जे कंपनीतील ३.२३ टक्के शेअर्सच्या बरोबरीचे आहेत. त्यांची हिस्सेदारी १४५४ कोटी रुपये आहे.

स्टार हेल्थ इन्शुरन्सचा बाजारातील हिस्सा ३१% आहे. गेल्या तीन वर्षांत कंपनीच्या एकूण प्रीमियममध्ये ३१.४% वाढ झाली आहे. तर रिटेल प्रीमियमचा वाटा ३२.४% आहे. आर्थिक वर्ष २०२१ मध्ये त्याचा एकूण प्रीमियम ९.३४९ कोटी रुपये होता. FY 20 मध्ये प्रीमियम ६,८९१ कोटी रुपये होता. त्याच वर्षी कंपनीला २७२ कोटी रुपयांचा तोटा झाला होता. तर २०२१ मध्ये तोटा ८२६ कोटी रुपये होता. आतापर्यंत सूचिबद्ध झालेल्या बहुतांश स्टार्टअप्स तोट्यात आहेत. झोमॅटोपासून पॉलिसीबाजार आणि पेटीएमपर्यंत सर्वच कंपन्या तोट्यात आहेत. Nykaa ने आर्थिक वर्ष २१ मध्ये नफा दाखवला असला तरी त्यापूर्वी ती तोट्यातही होती. सप्टेंबरच्या तिमाहीत कंपनीचा नफा केवळ १ कोटी रुपये होता.

बिग झुनझुनवाला यांची स्टार हेल्थ अँड अलाईड इन्शुरन्स कंपनीत गुंतवणूक –

एकूण शेअर्सची संख्या: ८.२८ कोटी – हिस्सा: १४.९८ टक्के

-सरासरी खरेदी किंमत: १५५.२८ रुपये

प्रति शेअर – परतावा: ४२१%

– खरेदी मूल्य: रु. १,२८७ कोटी

– सध्याचे मूल्यः ६,७०५ कोटी रुपये

-निव्वळ नफा: रु. ५,४१८ कोटी.