९ हजार रूग्ण संख्येचा टप्पा पार करत राज्यात ३१ जणांचा मृत्यू मुंबई महानगराची संख्या ७ हजार २२३ वर

मुंबई: प्रतिनिधी
राज्यात कोरोनाचा प्रसार रोखण्यासाठी राज्य सरकारकडून नागरिकांना सातत्याने आवाहन करण्यात येत आहे. तसेच लॉकडाऊन, संचारबंदी आदी गोष्टींची अंमलबजावणीही करण्यात येत आहे. मात्र कोरोना रूग्णांच्या संख्येत सातत्याने वाढच होत असून आज सर्वाधिक ३१ जणांचा मृत्यू झाला असून राज्यात नव्याने ७२९ रूग्ण आढळून आले असून ९ हजार ३१८ वर संख्या पोहोचली आहे.
एकट्या मुंबई शहरातील रूग्णांची संख्या ६ हजार १६९ तर मुंबई महानगराची संख्या ७ हजार २२३ वर पोहोचल्याची माहिती राज्याचे आरोग्य मंत्री राजेश टोपे यांनी सांगितले.
आतापर्यंत १३८८ रूग्ण बरे झाले असून त्यांना घरी पाठविण्यात आले आहे. मृत पावलेल्यांमध्ये मुंबईतील रूग्णांची संख्या २५, जळगांवचे ४, पुण्यातील २ जणांचा समावेश आहे. यापैकी १६ पुरूष तर १५ महिलांचा समावेश आहे. ६० वर्षावरील २० रूग्णांचा मृतकांमध्ये समावेश आहे. तर ४० ते ५९ वयोगटातील १०, ४० वर्षाखालील १ चा समावेश आहे. यातील २० रूग्णांमध्ये मधुमेह, उच्च रक्तदाब, हृदयरोग आदी आजार असल्याचे आढळून आल्याचे त्यांनी सांगितले.
आजपर्यत १ लाख २९ हजार ९३१ नमून्यांपैकी १ लाख २० हजार १२६ जणांचे नमूने निगेव्टीव्ह आहेत. सध्या राज्यात १ लाख ५५ हजार १७० नागरीक होम क्वारंटाईन मध्ये आहेत. तर ९ हजार ९१७ जण संस्थात्मक क्वारंटाईनमध्ये असल्याचे त्यांनी सांगितले.