कोरोना : २४८ मृतकांची नोंद, पण आकडेवारी २४ तासातील नाही ३२१४ नव्या रूग्णांचे निदान, ६९ हजार रूग्ण घरी

मुंबई: प्रतिनिधी
राज्याच्या आरोग्य विभागाकडून सध्या मृतकांच्या संख्येवरून घोळ घालण्यास सुरुवात केल्याचे दिसून येत असून २४ तासात झालेल्या मृतकांची आकडेवारी जाहीर करण्यास टाळाटाळ करत असल्याचे दिसून येत आहे. आज सर्वाधिक २४८ रूग्णांचा मृत्यूची नोंद झाल्याचे जाहीर करण्यात आले तरी ही आकडेवारी २४ तासातील नाही तर यातील ७५ मृत्यू ४८ तासातील तर १७३ मृत्यू हे मागील कालावधीतील असल्याचे सांगत नवा गोंधळ निर्माण करत असल्याचे दिसून येत आहे.
मागील २४ तासात ३२१४ नव्या रूग्णांचे निदान झाले आहे. तर १९२५ रूग्ण बरे झाल्याने त्यांना घरी पाठविण्यात आले आहे. त्यामुळे घरी जाणाऱ्यांची संख्या ६९ हजार ६३१ वर पोहोचली आहे. तर अॅक्टीव्ह रूग्णांची संख्या ६२ हजार ८३३ वर पोहोचल्याची माहिती आरोग्य मंत्री राजेश टोपे यांनी दिली.
राज्यातील रुग्ण बरे होण्याचे प्रमाण (Recovery Rate) ५०.०९ % एवढे झाले आहे. सध्या राज्यातील मृत्यूदर ४.६९ % एवढा आहे. आजपर्यंत पाठविण्यात आलेल्या ८,०२,७७५ नमुन्यांपैकी १,३९,०१० ( १७.३१ टक्के ) नमुने पॉझिटिव्ह आले आहेत. सध्या राज्यात ६,०५,१४१ लोक होमक्वारंटाईनमध्ये आहेत तर २६,५७२ लोक संस्थात्मक क्वारंटाईनमध्ये असल्याचे त्यांनी सांगितले.